X
تبلیغات

سئوگی ایله یاشاییش ...

یئنی بیر اوره ک ایسته ییره م ...

یکشنبه 2 مرداد‌ماه سال 1390 ساعات 11:40 ق.ظ

سنه مؤحتاجام ظالیم ...

 

 

یار دئدیم سینه مده یارام قانادی

دیلیم لال اولدو ، قانیم چاغلادی

گؤزلریمده یاش دورمادی آغلادی

عذاب‌لار ایچینده تنهایام ظالیم

 

یادیما دوشموسن بو آخشام یئنه

خیالیم دؤنوب دولانیر سنه

اصلینده نه اولوب بیلمیره م منه

حسرت اودونا یانیرام ظالیم

 

قلبیمده آیریلیغا دؤز دئییب

الویداع سؤیله دیم عادی سؤز بیلیب

سئوگی دونیام منی ویران ائدیب

سنین له سن‌سیز قالمیشام ظالیم

 

گؤزلریم یاشاردی، دیلیم توتولدو

محبت ساراییم چؤکدو، اوچولدو

آغلایان گؤزلرین قارشیمدا دوردو

یئنه ده سنه مؤحتاجام ظالیم

 

کوسکون م ، قلبیمی دویان یوخ هله

قلبی قلبیم له ووران یوخ هله

گئری دؤن آرادا هیجران یوخ هله 

سنین له ویصالا قووشام ظالیم ...!

شنبه 1 مرداد‌ماه سال 1390 ساعات 09:29 ق.ظ

منی باشی قارلی داغلاردا آختار ...

 

 

بیر گون من اولماسام سنین یانیندا

منی باشی قارلی داغ‌لاردا آختار 

یورولدون، توکندین، بیتدین ساناندا

دینجل، گول-چیچک‌لی باغ‌لاردا آختار

 

آختار، خوش خاطره کؤشه‌سینده‌یم

آختار، گولوشونون نئشه‌سینده‌یم

قلبی‌نین ان درین گؤشه‌سینده‌یم

منی اؤز-اؤزونون ایچینده آختار

 

سنه سئوگی آدلی جاهان وئرمیشم

جانیم‌دان آییریب اوچ جان وئرمیشم

عؤمرومو تک سنه قوربان وئرمیشم

منی قوربان‌لیق‌لار ساییندا آختار

 

قورخما کی یانیندا اولمایاجاغام

سنی اؤز روحوم لا یاشاداجاغام

بوتون بلا‌لاردان قورویاجاغام

منی اوجاغی‌نین کؤزونده آختار!...

پنج‌شنبه 30 تیر‌ماه سال 1390 ساعات 12:51 ب.ظ

بوغدوم گوز یاشیم دا محبتی می ...

 

 

خیانت بو گئجه قوناغیم اولدو
 

بو الوان دونیامین رنگ‌لری سولدو 
 

کدردن قلبیمه گؤز یاشی دولدو
 

بوغدوم گؤز یاشیمدا محبتیمی


 

آیاقدا ساخلادی منی اینتیزار
 

خزانا چئوریلدی سئودا‌لی باهار
 

کدردن گؤز یاشیم یاغیش تک یاغار 


بوغدوم گؤز یاشیمدا محبتیمی


 

اوره یین یئرینه باغلاندی بیر داش
 

نه دوشمن تانیدیم ، نه ده کی یولداش
 

دولویا چئوریلدی گؤزومده کی یاش
 

بوغدوم گؤز یاشیمدا محبتیمی